رابطة التراس الاهلى تدعو لمظاهرة ضخمة فى اول جلسات محاكمة مجزرة بورسعيد

قررت رابطة التراس أهلاوي تنظيم مسيرة ضخمة  أمام أكاديمية الشرطة صباح من أجل اول جلسات محاكمة المتهمين في مجزرة بورسعيد التي راح ضحيتها اكثر من 70 شهيد الثلاثاء القادم .

حيث قالت الرابطة على صفحتها بالفيس بوك “على كل عضو في الرابطة يستطيع الحضور يحاول أن يصطحب معه أصدقائه وأشقائه وعائلته من أجل جمع أكبر حشد ممكن لأن القضية ليست مجرد قضية قتل عمد مع سبق الاصرار والترصد وانما قضية شعب كامل ولابد أن يتحكم فيها بكل عدل وأسرع وقت

وهذا نص البيان :

يوم الثلاثاء القادم الموافق 17-4-2012 اولي جلسات محاكمه المتهمين في احداث بورسعيد في اكاديمية الشرطة بالتجمع الخامس الجروب وكل جمهور النادي الاهلي وكل احرار مصر هيبقوا موجودين عند المحكمه لازم نقف جمب اهالي اخواتنا ومنحسسهمش انهم لوحدهم اولاً

وعشان نجيب حق اخواتنا وموجودين لأخر نفس فينا لحد ما نجيب حقهم تعالي وهات معاك اي حد تعرفه والدك – والدتك – اخوك – اختك – صحابك – جيرانك ,لازم يعرفوا ان القضيه مش مجرد قضيه قتل مع سبق الاصرار والترصد بس لا دي قضيه شعب بالكامل ولازم يتحكم فيها بكل عدل وفي اسرع وقت

مش عاوزين ننجر ورا اى استفزازات لان فى ناس هتحاول تبعدنا عن الهدف الرئيسى اللى هنكون موجودين عشانه وهو حق اخواتنا , حط حق اخواتك قدام عنيك ومتخليش اي حد يستفزك لأن هو موقفه ضعيف وهيحاول يعمل معاك اي مشاكل فلازم متديش لأي حد فرصه لكده

واحنا مستعدين وقادرين اننا نحمى اهالي المتهمين في بورسعيد اللي هيجو والقضاه ,التجمع هيبقي في المناطق وكل منطقه هتجيب اتوبيسات وهنتجمع كلنا عند المحكمه ,التجمعات في المناطق هتبقي الساعه 8 صباحاً يوم الثلاثاء ,وكل واحد جي يعمل حسابه فى 10 جنيه عشان المواصلات وكل المناطق تبقي قدام المحكمه الساعه 10 صباحاً ..

تجمعات المناطق كالتالي :

شبرا مصر و شبرا الخيمه فى دوران شبرا عند المترو , دقى و عجوزة و بولاق و امبابة عند المحكمه ,مصر الجديدة و شيراتون وسراي القبة والزتون والعباسية عند كنتاكى الخليفة المأمون ,مدينه نصر الحي العاشر امام كشري هند ,المرج و السلام و اول جمال و قباء فى موقف العاشر ,السيدة زينب والمناطق المحيطه عند قهوة الحريه ,حلوان ومايو و صقر قريش و المعادي ودار السلام والمناطق المحيطه في صقر قريش عند ميدان صقر

القاهرة الجديدة عند محطة الاوتوبيسات في الرحاب ,المطريه : فى ميدان المطريه ,عين شمس كلها هنتجمع عند AHLY  ,sTORE

فيصل والهرم والعمرانيه والجيزه وضواحيها ان شاء الله هيبقي عند مسجد الاستقامه اللي ف ميدان الجيزه , حدايق القبه والوايلى والزاويه والاميريه فى ميدان الحدائق ,واي حد ساكن قريب من المحكمه او يعرف يروح لوحده يروح ويستني هناك

اهم حاجة الالتزام بسلمية اليوم والالتزام بتعليمات الناس المسئوله

رحم الله شهدائنا وإن شاء الله حقهم هيجى

المجد للشهداء