نصائح لمرضى السكر خلال شهر رمضان

نصائح من دكتور مجدي مجلع استشاري امراض السكر و الغدد الصماء و استاذ امراض الباطنة كلية الطب جامعة الاسكندرية و ذلك على صفحته على فيسبوك عزيزي مريض ال

Fatal explosion hits transit hub
منتخب مصر يودع مونديال الشباب رغم الفوز على انجلترا بهدفين
7 أهلى و4 زمالك فى معسكر منتخب 97 اليوم

نصائح من دكتور مجدي مجلع استشاري امراض السكر و الغدد الصماء و استاذ امراض الباطنة كلية الطب جامعة الاسكندرية و ذلك على صفحته على فيسبوك

عزيزي مريض السكر ..
كلمتين .. عن علاج #السكر_في_رمضان.

🤔 س١: هو إحنا ليه أحياناً #نقلق علي مريض السكر من الصيام ؟
👈 في “بعض” مرضى السكر .. ساعات نقلق من حدوث “نقص” السكر .. و أحيانا من “ارتفاع” نسبة السكر و ظهور أسيتون .. و ممكن لا قدر الله .. حدوث “جلطات” نتيجة للجفاف و نقص السوايل.

🤔 س٢: مين مريض السكر اللي ممكن يصوم عادي .. و مين اللي #ما_ينفعش يصوم و عنده رخصة يفطر؟
👈 المريض اللي ممنوع يصوم: مريض السكر #النوع_الأول المعتمد علي الأنسولين و سكره مش مظبوط و السيدات أثناء #الحمل و بيتعالجوا بأنسولين و مرضي قصور وظائف #الكلى و أمراض #القلب الحرجة و المريض الذي يعاني من #غيبوبة_السكر المتكررة.
👈 أما معظم مرضي السكر من #النوع_الثاني اللي بيتعالجوا بأقراص و السكر مظبوط و مفيش عندهم حاجة من اللي قولناها فوق .. فممكن يصوموا عادي جداً و #بأمان بإذن الله.

🤔 س٣: هو المفروض يبقي .. في رمضان ..عندي #جهاز تحليل سكر في البيت؟
👈 أكيد .. علشان نصوم بأمان مهم يبقي فيه جهاز تحليل سكر في البيت .. أهم وقت نحلل فيه .. الساعة ١٢ ظهراً و ٣ عصراً علشان نكتشف “نقص” السكر .. و بعد الفطار بساعتين علشان نكتشف “ارتفاع” السكر.

🤔 س٤: امتي أقرر “أكسر” صيامي و أفطر فورا؟
👈 رقمين مهمين .. احفظوهم .. لو لقيت السكر #أقل من ٧٠ أو لقيته #أكتر من ٣٠٠ .. في أي وقت و أنت صايم .. لازم تفطر في الحال .. إوعى تكمل صيام اليوم.

🤔 س٥: طيب #نظام_الأكل هيبقى إيه في رمضان؟
👈 وجبة إفطار .. و وجبة سحور .. و بينهما تصبيرة أو اثنين عبارة عن ثمرة فاكهة.
👈 الطبق يتقسم ٤ #أرباع، رُبع: سلطة خضراء (و يا سلام لو عليها معلقة زيت زيتون)، رُبع: خضار مطبوخ، رُبع: لحم أو سمك أو فراخ (مسلوق أو مشوي)، رُبع: نشويات (أرز أو مكرونة أو عيش).
👈 ممكن أوي ناخد #تمر (ثلاثة تمرات بس) في بداية الفطار. و لو لازم عصير يبقي عصير فاكهة (بدون سكر).
👈 أهم حاجة نشرب “مياه” كتير أوي (مش خروب و سوبيا) بين الفطار و السحور.
👈 على السحور .. مفيش أصح و لا أحلى من طبق الفول و العيش البلدي الأسمر و الزبادي و بيضة مسلوقة و شوية سلطة خضراء .. و بلاش مقليات .. و بلاش كنافة و قطايف.

🤔 س٦: طيب أخبار ممارسة #الرياضة إيه في رمضان؟
👈 “قبل” الفطار: بلاش تمارس رياضة.. خاصة لو الجو حر .. تجنباً لنقص السكر و فقدان السوايل.
👈 “بعد” الفطار: أرجوك اعمل رياضة خفيفة .. امشي مثلا نصف ساعة يوميا .. و كمان #صلاة_التراويح أجمل رياضة.

🤔 س٧: طيب بالنسبة #لدواء السكر .. هاخد نفس الجرعات في رمضان؟
👈 #الدكتور المعالج هو اللي يحدد ده ..حسب نوع الدواء اللي انت ماشي عليه.
👈 فيه أنواع “أقراص” بتاخد #نفس_الجرعات مع الصيام و مفيش منها خوف من حدوث نقص السكر.
👈 و فيه أنواع “أقراص” .. ممكن تسبب نقص السكر .. و بالتالي لازم #نقلل جرعتها في رمضان.
👈 أما #الأنسولين: لازم الدكتور يعدل لك “الجرعة” بتاعتك و يمكن “نوع” الأنسولين كمان .. علشان تناسب الصيام.

أتمنى لكم جميعا كل خير و صحة و سعادة.
و كل سنة و أنتم طيبين.
#رمضان_كريم.
#شير لو حسيتها مفيدة.

COMMENTS

WORDPRESS: 0
DISQUS: 0